Leat go don goassige smiehttan manne sámegiella ii oidno galbbain, mielkebáhkain dahje interneahtas? Don leat dákko bokte bovdejuvvon Giellavahkkui 2019! Searvva giellaloktemii!


Dáhton: golggotmánu 21.– 27. b. 2019

Báiki: Miehtá riikka

Geasa: Buohkat leat bovdejuvvon

Mii lea Sámi giellavahkku?

Sámi giellavahkku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.

Sámi giellavahkus mii ovttas oainnusmahttit ja buoridit máhtu sámegielaid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.

Sámi giellavahkku lea oassi Sámedikki guhkes áiggi giellaáŋgiruššamis – Giellalokten, ja dát lea maiddái Sámedikki ON álgoálbmogiid riikkaidgaskasaš giellajagi váldočalmmusteapmi.

Manne lea Sámi giellavahkku deaŧalaš?

Vaikko leat áitojuvvon jávkamis, de sámegielat ain bissot. Doaivva lea. Sámiid gaskkas lea dihtomielalašvuohta giela ja giellaválljema ektui, ja eanet ja eanet olbmot válljejit searvat kurssaide oažžun dihtii giela ruovttoluotta maid min máttut leat massán. Guovlluin gos sámegiella ii leat geavahuvvon sohkabuolvva dahje guovtti áiggi, de váldet dál nuorra rávisolbmot sámegiela ruovttoluotta ja geahččalit várrugasat addit dan viidáseappot mánáidasaset. Ođđa sámegielat sohkabuolva sámegielat mánáiguin bajásšaddá dál.

Norgga servodat lea maiddái fátmmastan sámi kultuvrra, ja sámit miehtá riikka vásihit ahte sin kultuvra ja gielat eanet dohkkehuvvojit. Beroštupmi sámi servodahkii lea stuoris, ja áigi goas dahkat oktasaččat giellaáŋgiruššama, ii sáhtášii leat buoret.

Maid don sáhtát dahkat?

Maid don sáhtát dahkat? Siđa báikkálaš gáffádaga jorgalit biebmolistta sámegielaide, lágit giellagáffádaga dahje heŋges Giellavahku plakáhta láse ovdii. Dus soitet leat eará buorit jurdagat, ja háliidat leat mielde Giellavahkus? Čális dákko giellalokten@samediggi.no, dahje válddes oktavuođa du lagamus sámi giellaguovddážiin!

Gulahallanoktavuohta Samediggi